Kryetari i Partisë Demokratike të Kosovës, Memli Krasniqi ka paralajmëruar se ky subjekt politik nesër do të fillojë betejën ligjore kundër vendimit të Zyrës së Rregullatorit për Energji (ZRrE) për daljen e bizneseve në treg të hapur.
Krasniqi ka thënë se nuk do të ndalen deri në deri në anulimin e këtij vendimi, të cilin e quajti një “krim kundër ekonomisë së Kosovës”.
Ai ka shtuar se kanë pritur që vendimi do të shtyhet derisa të krijohet një treg realisht i lirë dhe konkurrues për furnizimin me energji.
“Partia Demokratike e Kosovës nesër do të fillojë betejën ligjore për këtë rast. Kemi shpresuar që do të ketë racionalitet, që do ta shtyjnë vendimin sepse e vërteta është që nuk ka treg lirë e nuk mund të kesh treg të hapur kur e ke vetëm një kompani që shet rrymë. 19 të licensuara është një mashtrim sepse 18 prej tyre nuk ofrojnë shërbim është vetëm një, është monopol andaj ky vendim është dashur të shtyhej derisa të krijohet tregu i lirë, i vërtetë. Nesër do të bëjmë kundërshtim administrativ si hap të parë në Zyrën e Rregullatorit të Energjisë për të vazhduar betejen ligjore deri në anulimin e këtij vendimi që është krim kundër ekonomisë së Kosovës”, ka thënë Krasniqi pas dështimit të seancës së Kuvendit.
