Pas intervistimit të sotëm të ministrit në detyrë të Bujqësisë, Faton Peci nga Prokuroria Speciale ka reaguar kryetari i Lidhjes Demokratike të Kosovës, Lumir Abdixhiku duke thënë se në Kosovë ka lindur një epokë e re e drejtësisë.
Abdixhiku ka thënë se në këtë epokë paratë e vjedhura nga ata që e shohin veten mbi shtet, ligj e vend, do të kthehen cent më cent.
“Edhe në Kosovë, sikurse në secilin vend tjetër në Evropë, do të del një ditë një prokuror a dy, djem e vajza të reja e të rinj, që kanë guxim e integritet të trajtojnë secilin akt korruptiv; secilën hajni. Edhe atë të pushtetarëve. Sidomos atë të pushtetarëve. Atë ditë do të mburremi të gjithë – me shtetin tonë, me arritjet tona; me integritetin e njerëzve që i shërbejnë popullit të tyre pa frikë. Atë ditë, piskamat e politikanëve që mbrojnë hajninë vetëm pse hajni është i tyre – atë që u bërtet me fakte mu para syve – atë ditë, këto piskama nuk do të kenë më asnjë vlerë. Le të shpresojmë e besojmë, se pas aq shumë vitesh pritjeje, një guxim i tillë tashmë ka lindur. Dhe me të, ka lindur dhe një epokë e re e popullit tonë. Në këtë epokë, një e vërtetë e pashmangshme do të qëndrojë gjithëherë – se paret e vjedhura nga ata që e shohin veten mbi shtet, ligj e vend, do të kthehen cent më cent. Nga të gjithë”, ka shkruar ai në Facebook.
Ndryshe, ministri në detyrë i Bujqësisë, Faton Peci, ka përfunduar intervistimin e tij gati pesë-orësh nga Prokuroria Speciale në cilësinë e të dyshuarit për dhënien në shfrytëzim të Fabrikës për përpunimin e nënprodukteve.
https://teve1.info/pas-me-shume-se-kater-ore-perfundon-intervistimin-nga-prokuroria-speciale-ndaj-faton-pecit/
