Izraeli dhe Siria kanë zhvilluar takime të drejtpërdrejta në javët e fundit për të ulur tensionet dhe shmangur një konflikt në zonën kufitare.
Pesë burime të njohura me çështjen konfirmuan për Reuters se bisedimet do të fokusohen aktualisht në çështje sigurie.
Takimet, të mbështetura nga SHBA-të dhe ndërmjetësuar pjesërisht nga Emiratet e Bashkuara Arabe, përfshijnë zyrtarë të lartë të sigurisë nga të dyja palët. Nga pala siriane, bisedimet udhëhiqen nga Ahmad al-Dalati, i cili ka marrë pozita kyçe në provincat jugore që kufizohen me Izraelin.
Reuters nuk mundi të përcaktojë se kush mori pjesë në anën e Izraelit, megjithëse dy nga burimet thanë se ishin zyrtarë të sigurisë.
Pas rrëzimit të Bashar al-Assad nga pushteti në dhjetor nga grupi Hayat Tahrir al-Sham, Siria ka sinjalizuar se kërkon shmangien e përplasjes me Izraelin.
Presidenti i përkohshëm sirian, Ahmed al-Sharaa, e konfirmoi për herë të parë publikisht ekzistencën e bisedimeve indirekte, ndërsa burime thanë se ka pasur edhe raunde ballë për ballë në territore të kontrolluara nga Izraeli.
Ndërkohë, Izraeli ka ulur ritmin e bombardimeve në Siri, ndërsa Sharaa ka treguar sinjale të gatishmërisë për të shmangur kërcënimin ndaj Izraelit.
Ai ka përmendur një kthim të mundshëm në marrëveshjen e armëpushimit të vitit 1974, por nuk ka pranuar ende publikisht normalizimin e plotë të marrëdhënieve.
Siria ka ndërmarrë disa veprime simbolike për të ndërtuar besimin, përfshirë dorëzimin e sendeve personale të kryespiunit izraelit Eli Cohen dhe ndalimin e figurave të larta të Xhihadit Islamik Palestinez.
Izraeli ka pushtuar Lartësitë siriane të Golanit që nga lufta arabo-izraelite e vitit 1967 dhe ka pushtuar më shumë territor pas rrëzimit të Assadit në dhjetor.
.
