Kreu i Fondacionit Humanitar të Gazës (GHF), Jake Wood, ka dhënë dorëheqjen, duke thënë se nuk mund të vepronte në përputhje me parimet humanitare të njerëzimit, neutralitetit, paanshmërisë dhe pavarësisë.
Wood dha dorëheqjen nga Fondacioni Humanitar i Gazës (GHF) të dielën vonë, duke thënë se nuk do të ishte në gjendje të përmbushte parimet e “njerëzimit, neutralitetit, paanshmërisë dhe pavarësisë”.
Plani parashikon që kontraktorë privatë të shpërndajnë ndihma përmes katër pikave në Gazën jugore, duke kërkuar që civilët, përfshirë të plagosurit dhe të dobëtit, të shkojnë vetë për të marrë ndihmën, ka raportuar BBC.
OKB-ja e ka kritikuar ashpër planin, duke refuzuar pjesëmarrjen dhe duke paralajmëruar se mund të përkeqësojë zhvendosjet dhe krizën humanitare.
GHF njoftoi se do të vazhdojë me shpërndarjen që nga e hëna, duke synuar të ndihmojë një milion palestinezë.
Grupi kritikoi kundërshtarët e planit si mbrojtës të status quo-së. Ndërkohë, Izraeli thotë se synon të ndalë Hamasin të përvetësojë ndihmat.
Pas lehtësimit të pjesshëm të bllokadës, ndihma ka filluar të hyjë, por OKB-ja thotë se ajo mbetet e pamjaftueshme për të shmangur urinë masive. Deri tani, 57 fëmijë kanë vdekur nga kequshqyerja, sipas organizatave ndërkombëtare.
