Në komunën e Zubin Potokut, gjatë një ndalimi policor, në tetor të vitit 2023, Stefan Spasojeviq, dyshohet se bëri veprime që nxisin urrejtjen, përçarjen dhe mos durimin ndërmjet grupeve etnike në Kosovë.
Veshja që mbante veshur, kishte hartën e Kosovës me mbishkrimin “Ne nuk do ta japim tokën e Car Dushanit”.
Për këtë gjest, ai u ngarkua nga Prokuroria Speciale me veprën penale “Nxitja e përçarjes dhe mosdurimit”.
“I pandehuri me qëllim të nxitjes së urrejtjes, përçarjes dhe mosdurimit ndërmjet grupeve etnike në Republikën e Kosovës, si dhe me qëllim të prishjes së rendit publik, ka ndërmarrë veprime konkrete në atë mënyrë që gjatë ndalimit për kontroll policorë, i pandehuri ka pasur të veshur një maicë të zezë me mbishkrime nacionaliste”, tha prokurori Bekim Kodraliu.
Palët arritën marrëveshje për pranimin e fajësisë.
Bazuar në këtë, gjatë marrjes së vendimit nga ana e Gjykatës, mbrojtja kërkoi që të merret parasysh diçka.
“Pendimin e tij të thellë dhe kërkim faljen për veprimet e tij”, tha Shyqyri Syla, avokat i Spasojeviq.
Spasojeviq, të hënën u dënua me tre mijë euro gjobë për nxitje të përçarjes, dënim i cili zëvendëson dënimin me burg prej gjashtë muajsh.
“Dënimi i shqiptuar në burgim në kohëzgjatje prej gjashtë muajsh, me pëlqimin e të akuzuarit, i zëvendësohet me me dënim me gjobë në lartësi prej tre mijë euro. Shumë të cilën, i akuzuari obligohet që të paguajë pas plotfuqishmërisë së këtij aktgjykimi”, tha gjykatësi Lutfi Shala.
Në shpalljen e aktgjykimit, prezent nuk ishin pala e akuzuar e as prokurori.
