Jerusalemi Lindor u trondit të hënën nga skena shqetësuese, ndërsa grupe të rinjsh izraelitë marshuan përmes lagjeve myslimane të Qytetit të Vjetër, duke brohoritur slogane urrejtjeje si “Vdekje arabëve”.
Marshimi, i njohur si “Dita e Jerusalemit”, përkujton marrjen nën kontroll të Jerusalemit Lindor nga Izraeli gjatë luftës së vitit 1967.
Përpara nisjes së procesionit, shumë dyqane palestineze u mbyllën dhe rrugicat e ngushta të qytetit u bllokuan nga policia izraelite për të garantuar sigurinë e marshuesve.
Pavarësisht kësaj, atmosfera ishte e tensionuar dhe nganjëherë armiqësore. Në një moment, një polic shihej duke ngritur duart në shenjë festimi e duke përqafuar një nga pjesëmarrësit, teksa temperaturat arrinin mbi 37 gradë Celsius.
Në të njëjtën ditë, një grup protestuesish, përfshirë edhe një deputet të Knessetit, sulmoi një objekt të agjencisë së Kombeve të Bashkuara për refugjatët palestinezë (UNRWA) në Jerusalemin Lindor, ka raportuar AP, duke rritur kështu edhe më tej tensionet në zonë.
Ngjarja zhvillohet në një moment të ndjeshëm, ndërsa lufta në Gaza ka hyrë në ditën e saj të 600-të.
Dita e Jerusalemit, e cila shpesh shoqërohet me parakalime ultranacionaliste dhe tensione ndëretnike, shihet si një pikë e nxehtë që mund të përshkallëzojë dhunën.
Izraeli e konsideron të gjithë Jerusalemin si kryeqytetin e tij të pandarë, ndërsa palestinezët kërkojnë Jerusalemin Lindor si kryeqytet të shtetit të tyre të ardhshëm.
Aneksimi i pjesës lindore nuk është njohur nga komuniteti ndërkombëtar.
Ngjarjet e viteve të kaluara kanë treguar rreziqet që mbart kjo ditë. Në vitin 2021, marshimi kontribuoi në nisjen e një konflikti 11-ditor në Gaza. Ndërkohë, në edicionin e vitit të kaluar, një gazetar palestinez u sulmua dhe pati thirrje për dhunë ndaj palestinezëve.
