Gjatë javës së kaluar, zyrtarët policorë të rajonit të Prishtinës kanë zhvilluar aktivitete të shumta në funksion të zbatimit të urdhëresave gjyqësore dhe ruajtjes së sigurisë publike.
Në kuadër të këtyre veprimeve, janë ekzekutuar gjithsej 216 urdhëresa të gjykatës, prej tyre 84 për vepra penale, ndërsa të tjerat për kundërvajtje, seanca gjyqësore dhe verifikime të ndryshme.
Pas përfundimit të procedurave të parapara ligjore, personat e dënuar me burgim janë dërguar për vuajtjen e dënimit, ndërsa ata të dënuar me gjoba janë liruar pasi kanë përmbushur obligimet e përcaktuara.
Aktivitetet policore janë shtrirë edhe në fusha të tjera të sigurisë. Gjatë kësaj periudhe janë sekuestruar tre armë zjarri dhe municione të ndryshme, të llojeve dhe kalibrave të ndryshëm.
Në aspektin e sigurisë në trafikun rrugor, Policia e Prishtinës ka shqiptuar 4108 gjoba për shkelje të ndryshme të Kodit Rrugor, prej të cilave 659 janë evidentuar përmes veturave inteligjente dhe radarëve mobilë.
Policia e Kosovës mbetet e përkushtuar në garantimin e rendit dhe sigurisë për të gjithë qytetarët.
