Një shtetas i huaj është gjetur pa shenja jete të dielën në rrugën “Fan Noli” në Prishtinë.
Lajmin për tëvë1.info e ka konfirmuar zëdhënësja e Policisë për rajonin e Prishtinës, Flora Ahmeti.
Ahmeti ka bërë të ditur se vdekjen e viktimës e ka konstatuar ekipi mjekësor në vendngjarje, ndërsa hetimet për zbardhjen e rastit kanë filluar.
“Rreth orës 10:30,kemi pranuar informatën se një person pa shenja jete në rrugën “Fan Noli”në Prishtinë. Vdekjen e viktimës (mashkull, shtetas i huaj) e ka konstatuar ekipi mjekësor në vend ngjarje. Policia në koordinim me prokurorin e shtetit ka nisur një hetim mbi vdekjen si dhe po vazhdon me ndërmarrjen e të gjitha veprimeve hetimore për sqarimin e plotë të rrethanave të rastit”, ka thënë Ahmeti.
Ndërkaq, zëdhënësja e Prokurorisë Themelore në Prishtinë, Kaltrina Shala, ka konfirmuar se janë duke ndërmarrë të gjitha masat dhe veprimet hetimore lidhur me këtë çështje.
Shala po ashtu ka njoftuar se është lëshuar autorizim që trupi i pajetë i viktimës të dërgohet në Institutin e Mjekësisë Ligjore për obduksion.
“Prokurori i shtetit ka autorizuar që trupi të dërgohet në Institutin e Mjekësisë Ligjore. Prokurori i shtetit është duke ndërmarrë të gjitha masat dhe veprimet hetimore lidhur me këtë çështje”, ka bërë të ditur Shala.
