Një sulm ajror izraelit të dielën vrau edhe një gazetar palestinez në Rripin e Gazës, duke e çuar në 220 numrin e gazetarëve të vrarë që nga fillimi i ofensivës usharake izraelite në tetor 2023, sipas autoriteteve lokale.
Hassan Majdi Abu Warda, drejtor i agjencisë së lajmeve Barq Gaza, humbi jetën së bashku me disa anëtarë të familjes së tij gjatë një sulmi që goditi shtëpinë e tyre në lagjen Jabalia Nazla, në veri të Gazës, bëri të ditur zyra e medias e qeverisë së Gazës.
Zyra dënoi ashpër vrasjet e vazhdueshme të gazetarëve në territorin palestinez, duke i cilësuar ato si “krime sistematike” nga Izraeli dhe u bëri thirrje organizatave ndërkombëtare të të drejtave të njeriut dhe mediave globale të dënojnë këto veprime, raporton Anadoly.
Që prej tetorit 2023, Izraeli ka ndërmarrë një ofensivë të përgjakshme kundër Gazës, pavarësisht thirrjeve të vazhdueshme ndërkombëtare për një armëpushim. Sipas autoriteteve palestineze, mbi 53,900 persona janë vrarë deri më tani – shumica prej tyre gra dhe fëmijë.
Në nëntor të vitit të kaluar, Gjykata Ndërkombëtare Penale (GJNP) lëshoi urdhër-arreste për Kryeministrin izraelit Benjamin Netanyahu dhe ish-ministrin e Mbrojtjes Yoav Gallant, duke i akuzuar për krime lufte dhe krime kundër njerëzimit të kryera në Gaza.
Për më tepër, Izraeli po përballet me një proces gjyqësor për gjenocid në Gjykatën Ndërkombëtare të Drejtësisë (GJND), për veprimet e tij në enklavën palestineze. Ndërkohë, situata humanitare në Gaza vazhdon të përkeqësohet për shkak të bombardimeve të pandërprera dhe bllokadës së rreptë.
