“Jam i shqetësuar për rritjen e gjuhës së urrejtjes, si në internet ashtu edhe në mediat tradicionale,” deklaroi të mërkurën, në përfundim të vizitës së tij zyrtare në Serbi, Komisioneri i Lartë i Kombeve të Bashkuara për të Drejtat e Njeriut, VolkerTürk.
Ai vlerësoi se në shënjestër janë gratë, romët, personat LGBTIQ+ dhe gazetarët.
“Dhe ndonjëherë madje edhe politikanë e zyrtarë të lartë përfshihen në një retorikë të mbushur me urrejtje. Demonizimi dhe stigmatizimi i atyre që ushtrojnë dhe mbrojnë të drejtat e tyre, mund të çojnë vetëm në polarizim të thelluar dhe frikë,” vlerësoi zyrtari i lartë në një konferencë për shtyp.
Gjatë qëndrimit në Beograd, ai u takua me përfaqësues të institucioneve si dhe me studentë që po protestojnë prej më shumë se gjashtë muajsh.
Në bisedimet me autoritetet, ai tha se ka apeluar për “një hetim transparent lidhur me aksidentin në stacionin hekurudhor në Novi Sad, si dhe për të gjitha pretendimet për dhunë ndaj protestuesve paqësorë.”
Për studentët tha se ishte “i impresionuar nga energjia dhe entuziazmi i atyre të rinjve.”
“Zërat e tyre duhet të dëgjohen dhe respektohen,” deklaroi Türk, duke përmbyllur se “shoqëritë përparojnë kur ekziston një hapësirë e hapur dhe e lirë për dialog, dhe ku kritika mund të shprehet pa frikë nga hakmarrja.”
Studentët kanë bllokuar prej muajsh dhjetëra fakultete në Serbi dhe bashkë me qytetarët që i mbështesin, organizojnë protesta. Kërkesa e tyre kryesore është që të mbahet përgjegjësi për vdekjen e 16 personave nga shembja e çatisë së stacionit hekurudhor në Novi Sad.
Komisioneri i Lartë i OKB-së për të Drejtat e Njeriut, VolkerTürk, tha gjithashtu se gjatë vizitës ka diskutuar edhe për çështjen e arrestimit të aktivistëve në Novi Sad. Nuk dha detaje për këto bisedime, por tha se shpreson që çështja të zgjidhet.
Gjashtë aktivistë nga Novi Sadi ndodhen në paraburgim prej më shumë se dy muajsh. Tre prej tyre janë liruar me masën e arrestit shtëpiak.
Ky vendim i gjykatës në Novi Sad ka nxitur kritika të ashpra nga përfaqësues të pushtetit dhe të Partisë Progresive Serbe në pushtet.
