Një sulm me raketa ruse goditi një poligon stërvitor në rajonin kufitar të Sumy-t, duke vrarë gjashtë ushtarë ukrainas dhe plagosur mbi 10 të tjerë, njoftoi Garda Kombëtare e Ukrainës.
Sulmi ndodhi gjatë një ushtrimi ushtarak dhe është cilësuar si një goditje e rëndë për forcat ukrainase. Komandanti i njësisë është pezulluar dhe është hapur një hetim zyrtar.
Ministria e Mbrojtjes e Rusisë publikoi një video që pretendon të tregojë momentin e sulmit, ndërsa agjencia shtetërore Tass raportoi për deri në 70 të vrarë. Megjithatë, këto pretendime nuk janë verifikuar në mënyrë të pavarur.
Rajoni i Sumy-t është nën sulme të vazhdueshme, ndërkohë që Ukraina ka nisur një ofensivë në rajonin fqinj të Kurskut të Rusisë për të krijuar një “zonë tampon” mbrojtëse.
Shtabi i Përgjithshëm i Ukrainës e cilëson këtë operacion si strategjik, duke pretenduar se e ka detyruar Rusinë të zhvendosë forcat më të afta për t’iu kundërpërgjigjur, raporton BBC.
Ndërkohë, presidenti rus Vladimir Putin vizitoi rajonin e Kurskut, takoi zyrtarë lokalë dhe vizitoi një central bërthamor — vizita e tij e parë në këtë zonë që prej fillimit të ofensivës ukrainase.
Pavarësisht përpjekjeve të Ukrainës, ofensiva në Kursk nuk ka arritur të ndalojë përparimin e Rusisë në lindje. Luftimet mbeten të ashpra, me forcat ukrainase që raportojnë 14 sulme ruse gjatë natës në zonat Druzhba, Petrivka dhe Toretsk.
Kritikat ndaj komandës ushtarake ukrainase po rriten, me disa zyrtarë që denoncojnë humbjet e panevojshme dhe urdhrat “të pakuptimtë”. Ndërkohë, Rusia vazhdon të forcojë praninë e saj ushtarake, përfshirë edhe dërgimin e mijëra ushtarëve nga Koreja e Veriut në rajonet e përfshira nga lufta.
Lufta, e cila nisi me pushtimin në shkallë të plotë të Ukrainës në shkurt 2022, vazhdon të sjellë viktima të shumta dhe shkatërrim, me vijën e frontit që mbetet e paqëndrueshme dhe përparimet të kufizuara.
