Punimet i nisën në vikend.
Por, shumë shpejtë, punëtorët e KEDS, u detyruan t’i ndalin ato.
Kjo meqë në afërsi të Xhamisë së Çarshisë në Prishtinë, hasën në gjetje arkeologjike.
Për këtë, reagoi menjëherë Inspektorati i Trashëgimisë Kulturore duke ua ndalur punimet.
Në arsyetimin e KEDS thuhet se nuk e ditën se zona është e mbrojtur.
“Megjithatë, KEDS-i nuk ka pasur njohuri nëse kjo është zonë e mbrojtur, çka nuk na është thënë nga komuna dhe as nëse duhet të aplikohet për leje në Qendrën Rajonale për Trashëgimi Kulturore në Prishtinë. Sidoqoftë, aktualisht KEDS-i po merret me parapërgatitjen e dokumentacionit të nevojshëm që po e kërkon kjo qendër, në mënyrë që të aplikohet pastaj për leje pune”, thuhet nga KEDS.
Madje për këto punime, KEDS thotë se u pajisën me leje nga vet Komuna e Prishtinës.
“Për implementimin e punimeve në rrjet në zonën në fjalë, KEDS-i është pajisur paraprakisht me leje pune nga komuna, njëjtë siç ndodh rëndom në raste të tilla të ngjashme”.
Tëvë1 ka pyetur në Komunën e Prishtinës, nëse këta të fundit dhanë leje për këto punime në zonën e mbrojtur.
Por, nga komuna nuk kthyen përgjigje.
E njëjtë nuk janë përgjigjur, as nga Instituti i Trashëgimisë Kulturore, për gjetjet arkeologjike apo dëmin e shkaktuar nga këto punime.
