Udhëheqësi Suprem i Iranit, Ayatollah Ali Khamenei, tha të martën se nuk ka besim se negociatat indirekte bërthamore mes Teheranit dhe Uashingtonit do të sjellin ndonjë “rezultat domethënës”.
Komentet e tij erdhën gjatë një ceremonie për shënimin e përvjetorit të parë të vdekjes së ish-presidentit iranian Ebrahim Raisi, i cili humbi jetën në një aksident helikopteri në Iranin verior vitin e kaluar.
Khamenei theksoi se Raisi kishte deklaruar qartë në vitin 2021 se nuk do të angazhohej në bisedime direkte me SHBA-në dhe, ndonëse negociatat indirekte vazhduan gjatë presidencës së tij, ato nuk dhanë asnjë rezultat.
Ai shtoi se Raisi “nuk e lejoi armikun të pretendonte se Irani u angazhua në bisedime përmes kërcënimeve”.
Duke folur për vazhdimësinë e negociatave, Khamenei shprehu dyshime se ato do të çonin në ndonjë rezultat konkret, duke theksuar se “nuk dimë se çfarë do të ndodhë”, ka shkruar Anadoly.
Iran dhe SHBA kanë rinisur bisedimet bërthamore që nga muaji i kaluar, me Omanin që vepron si ndërmjetës. Katër raunde negociatash indirekte janë zhvilluar deri tani, duke përfshirë të fundit në Muskat të dielën.
Më herët, Kazem Gharibabadi, zëvendësministri i Jashtëm i Iranit dhe anëtar i ekipit negociator, njoftoi se ishte paraqitur një propozim i ri për raundin e ardhshëm të bisedimeve dhe se ishte “aktualisht në shqyrtim”.
Khamenei gjithashtu hodhi poshtë kërkesën e zyrtarëve amerikanë për shpërbërjen e programit të pasurimit të uraniumit të Iranit, duke e quajtur atë “arrogancë të pastër”. Ai iu bëri thirrje SHBA-së të shmangin deklarata të tilla gjatë negociatave dhe theksoi: “Askush nuk po pret lejen e askujt.”
Në një deklaratë të tij, Ministri i Jashtëm i Iranit dhe kryenegociatori bërthamor, Abbas Araghchi, tha se programi iranian i pasurimit do të vazhdojë “me ose pa një marrëveshje” me SHBA-në. Ai shtoi se Irani është i gatshëm për biseda serioze, por pa u ndalur në procesin e pasurimit.
Komentet e tij erdhën pas deklaratës të dërguarit special të SHBA-së për Lindjen e Mesme, Steve Witkoff, i cili tha se çdo marrëveshje me Iranin duhet të përfshijë një marrëveshje për të ndaluar pasurimin e uraniumit.
Ai theksoi se “vija e kuqe” për SHBA-në është pasurimi, duke theksuar se nuk mund të lejohet as edhe një përqind i kapacitetit të pasurimit.
