Prokuroria Themelore e Prishtinës ka bërë të ditur se janë ndaluar të hënën dy persona, nën dyshimin për veprën penale të marrjes së ryshfetit dhe ushtrim i ndikimit.
Të dyshuarit janë zyrtarë publikë. Ata dyshohen se me qëllim që i kanë marrë një personi para në këmbim që ta kalojë testin praktik të vozitës.
Të dyshuarit janë ndaluar për 48 orë.
“Personat e ndaluar janë zyrtarë publikë të cilët dyshohen se me qëllim që viktima të kalojë testin praktik të vozitjes i kanë kërkuar para ryshfet, të cilat i kanë pranuar dhe për shumën e pranuar, kandidatja ka kaluar testin. Ndaj të dyshuarve është caktuar masa e ndalimit prej 48 orësh, ndërsa brenda afateve ligjore, Prokurori i Shtetit do të ndërmerr veprimet e nevojshme procedurale në grumbullimin e provave. Prokurori i Shtetit njofton opinionin publik se mbetet i përkushtuar në luftimin e kriminalitetit dhe korrupsionit dhe se do të ndërmerr të gjitha veprimet ligjore për parandalimin e këtyre veprave, si dhe dërgimin para gjykatës të secilit kryes të këtyre veprave penale”, ka njoftuar Prokuroria.
E Policia e Kosovës ka njoftuar se kanë zhvilluar hetime që nga prilli i këtij viti dhe janë shoqëruara me masa të posaçme hetimore.
“Gjatë operacionit janë sekuestruar dëshmi të rëndësishme materiale që lidhen me rastin. Në prezencë të avokatit mbrojtës dy persona të dyshuar janë intervistuar dhe me vendim të prokurorit janë dërguar në mbajtje deri në 48 orë. Policia ka kontrolluar dy lokacione të ndryshme dhe ka identifikuar mjete të dyshuara të përdorura në kryerjen e veprës penale. Hetimet janë duke vazhduar me qëllim të zbardhjes së plotë të rastit dhe vënies së përgjegjësve para organeve të drejtësisë”, ka njoftuar Policia.
