Deputeti i Lidhjes Demokratike të Kosovës, Arben Gashi u shpreh se marrja pjesë në seancat konstituive nuk i bie të jesh “argat” i Albin Kurtit dhe i askujt tjetër. Sipas tij, shkuarja në seancë është detyrë kushtetuese dhe obligim ndaj qytetarëve prej të cilëve morën votë.
Para gazetarëve, Gashi tha se LDK-ja nuk do të jepte opsion për zgjidhjen e situatës, nëse do të ndihej e pa përgjegjshme.
Ai potencoi se Lëvizja Vetëvendosje e ka për detyrë kushtetuese të gjejë konsensusin brenda kuvendit.
“Nuk është argat ndaj Albin Kurtit dhe ndaj askujt tjetër, është detyrë kushtetuese. Është detyrim ndaj qytetarëve të Kosovës që na kanë votuar dhe është obligim i yni që të paraqitemi sipas rregullores së kuvendit të Republikës së Kosovës, për të tentuar për të gjetur zgjidhje…Ndjejmë obligim dhe për këtë arsye edhe kemi dhënë opsion, përndryshe nëse ne do të ndiheshim të papërgjegjshëm nuk do të jepnim opsion…Ne kemi ofruar zgjidhjen, nuk ka qenë e pranueshme për Vetëvendosjen si duket, duhet të presim që LVV të gjejë zgjidhjen”, potencoi Gashi.
