Analisti, Albinot Maloku ka deklaruar se në zgjedhjet e 11 majit në Shqipëri nuk është se kryeministri aktual, Edi Rama ka qenë më i mirë por sipas tij qytetarët thjesht nuk kanë pasur opozitë alternativë.
Duke folur për situatën pas zgjedhjeve atje, Maloku në emisionin “Këndi I Debatit” në Tëvë1 është shprehur se Partia Demokratike e Shqipërisë e ka momentumin të reflektojë.
Sipas tij, do të ishte më e shëndetshme që kryetari i PD-së, Sali Berisha të hiqte dorë nga ky subjekt dhe ta linte të lirë për të marrë një formë dhe drejtim tjetër.
“Kishte me qenë shumë e shëndetshme që kreu aktual I Partisë Demokratike të Shqipërisë të falenderonte votuesit e tij. Ishte një situatë interesante me këtë parti e cila kaloi nëpër shumë faza jashtëzakonisht kritike dhe unë këtë moment e shoh sikur PD-ja po merr formën e ruajtjes së identitetit të saj dhe në kushte normale një proces i brendshëm, i sinqertë zgjedhor për shkak se Berisha po flet rregullisht për pa sinqeritetin e procesit zgjedhor, mirëpo të bëhemi të qartë edhe brenda PD-së nuk është se ka pasur një proces të mirëfilltë zgjedhor edhe për kandidaturat që kanë qenë për deputetë tani. Unë këtë momentum e shoh jashtëzakonisht interesant për PD-në e Shqipërisë që të reflektoj dhe çfarë është më kryesorja kishte me qenë shumë më e shëndetshme që kreu i saj përfundimisht të falenderonte votuesit, angazhimin e secilit dhe të lironte Partinë Demokratike për të marrë një formë tjetër, një drejtim tjetër. Në Shqipëri kësaj here nuk është se ka qenë Edi Rama më I miri por opozitë alternativë qytetari nuk ka pasur”, ka thënë ai.
Tre ditë pas zgjedhjeve parlamentare të 11 majit, kreu i Partisë Demokratike, Sali Berisha, në një deklaratë për media deklaroi se opozita po përgatit luftën për mbrojtjen e votës.
Duke paralajmëruar se nuk do ta njohë rezultatin e 11 majit, Berisha i bëri thirrje vëzhguesve dhe numëruesve që ta kryejnë deri në fund detyrën.
“Zgjedhjet janë grabitur”, deklaroi Berisha, duke shtuar se “plaçka e grabitur duket të kthehet”.
