Të martë është mbyllur kompania paralele e ujësjellësit “Ibar” në Mitrovicën e Veriut.
Këtë e ka bërë të ditur ministrja në detyrë e Ekonomisë, Artane Rizvanolli.
Ajo ka thënë se ky është një hap konkret në sundimin e ligjit dhe funksionalizimit të shërbimeve publike nga institucionet e shtetit.
“Në përputhje me marrëveshjen e nënshkruar në janar të këtij viti mes KRU Mitrovicës dhe Komunës së Mitrovicës së Veriut, shërbimet e rregullta e më cilësore për qytetarët e Komunës së Mitrovicës së Veriut do të ofrohen nga KRU Mitrovica, me standarde më të larta dhe në përputhje të plotë me ligjet tona.Falënderoj Policinë e Kosovës për mbështetjen dhe falënderoj KRU Mitrovicën për gatishmërinë për t’u shërbyer të gjithë qytetarëve të Republikës së Kosovës pa dallim. Ky është shteti ynë, këto janë institucionet tona, dhe ato do të jenë të vetmet që shërbejnë në Republikën e Kosovës”, ka shkruar ajo.
Për këtë ka reaguar edhe kryeministri në detyrë Albin Kurti.
“Përgëzime dhe punë të mbarë KRU Mitrovicës në ofrimin e shërbimeve cilësore për të gjithë qytetarët e Komunës së Mitrovicës së veriut”, ka shkruar Kurti.
