Ishte ish-kancelarja gjermane Angela Merkel ajo e cila në verën e vitit 2014 nga një konferencë e nivelit të lartë e inicioi Procesin e Berlinit. Seritë e samiteve që filluan nga Berlini e që po vazhdojnë kanë për qëllim rritjen e bashkëpunimit mes vendeve të Ballkanit Perëndimor e kësisoj përshpejtimin e integrimit të tyre në Bashkimin Evropian.
Megjithatë, tetë vjet më pas, me ardhjen në krye të kancelarit të ri gjerman, Olaf Scholz, kryeministri Albin Kurti ka ardhur me një ide të re.
Gjatë qëndrimit në Shtetet e Bashkuara të Amerikës ai kërkoi që të krijohet Procesi i Berlinit 2.0, një proces më i sofistikuar ku palët do të punonin në bazë të afateve kohore.
Sociologu Artan Muhaxhiri vlerëson se me ardhjen e kancelarit të ri gjerman janë vërejtur iniciativa të shumta për ringjalljen dhe mbrojtjen e rajonit. Idenë e kryeministrit e sheh si të mirë, por vështirë të realizueshme.
“Ideja e kryeministrit Kurti parimisht është shumë e mirë sepse sa më shumë që të përcaktohen orare dhe sa më shumë që të specifikohen fazat e Berlinit, suksesi dhe efektiviteti do të jetë më i madh. Por për fat të keq pesha politike nuk është aq e madhe sa të diktojë agjenda. Deri më tani ka pas shumë takime formale, nuk ka pas ndonjë qasje më pragmatike sa i përket efekteve konkrete ekonomike, politike e kshtu me radhë”, thotë Muhaxhiri.
Ndërsa njohësi i çështjeve politike Gazmir Rraci idenë e kryeministrit e sheh si të qëlluar, marrë parasysh agresionin rus në Ukrainë.
“Natyrisht që edhe iniciativa e Berlinit duhet të futet në dinamika të reja dhe më shumë të përshpejtuara sepse Ballkani Perëndimor rrezikohet natyrisht po ashtu edhe nga ndikimi rus dhe është me rëndësi që gjashtë vendet e B.Perëndimor të integrohen më shpejt në strukturat euroatlantike në mënyrë që të rrumbullakohet siguria kolektive në këtë pjesë”, thotë Rraci.
Njëra prej rezultateve më të rëndësishme të procesit së fundmi ka qenë miratimi i planit për Tregun e Përbashkët Rajonal. Një iniciativë e tillë po mbështetet edhe nga Qeveria e Kosovës.
Kronika e realizuar nga Gojart Jashari.
