India dhe Pakistani ranë dakord për një armëpushim të plotë të shtunën, pas bisedimeve të ndërmjetësuara nga Shtetet e Bashkuara për t’i dhënë fund një përshkallëzimi të rrezikshëm ushtarak ndërmjet dy fuqive bërthamore.
Megjithatë, vetëm disa orë pas njoftimit, shpërthime u dëgjuan në qytetet Srinagar dhe Jammu në rajonin e kontestuar të Kashmirit, duke ngritur dyshime serioze mbi qëndrueshmërinë e marrëveshjes.
Armëpushimi erdhi pas disa javësh tensionesh intensive, që përfshinë sulme me raketa dhe dronë, pas një masakre ndaj turistëve, për të cilën India fajëson Pakistanin. Ky i fundit i ka mohuar akuzat.
Presidenti amerikan Donald Trump ishte i pari që bëri publike marrëveshjen përmes një postimi në rrjetin e tij social, Truth Social, ku shkroi: “Urime të dy vendeve për përdorimin e arsyes dhe inteligjencës. Faleminderit për vëmendjen ndaj kësaj çështjeje!”
Por, brenda disa orësh, banorët raportuan shpërthime të fuqishme dhe ndërprerje të energjisë elektrike në dy qytete kryesore të Kashmirit. Autoritetet indiane nuk raportuan viktima, por reagimet ishin të menjëhershme, raporton AP.
Sekretari i Jashtëm indian, Vikram Misri, deklaroi se shefat e operacioneve ushtarake të të dy vendeve kishin zhvilluar një bisedë në të cilën ranë dakord për ndaljen e menjëhershme të çdo veprimi ushtarak — në tokë, ajër dhe det.
Më vonë, ai akuzoi Pakistanin për “shkelje të përsëritura” dhe për një “hyrje të paautorizuar” në territorin indian. “I bëjmë thirrje Pakistanit të ndërmarrë hapa konkrete për të respektuar marrëveshjen dhe për të treguar përgjegjësi,” tha ai në një konferencë për shtyp në Nju Delhi.
Nga ana tjetër, Ministria e Jashtme pakistaneze hodhi poshtë akuzat, duke thënë se India ishte ajo që kishte shkelur armëpushimin. Sipas saj, forcat pakistaneze po veprojnë me “përmbajtje dhe përgjegjësi”, dhe Islamabadi mbetet i përkushtuar ndaj paqes.
Kryeministri pakistanez Shehbaz Sharif, në një fjalim të transmetuar drejtpërdrejt, deklaroi se vendimi për armëpushimin ishte një hap drejt stabilitetit në rajon dhe një mundësi për të zgjidhur çështjet e pazgjidhura me Indinë, përfshirë edhe mosmarrëveshjen shumëvjeçare për Kashmirin, përmes dialogut paqësor.
Reagimet në terren ishin të menjëhershme. Omar Abdullah, zyrtari më i lartë i zgjedhur në pjesën indiane të Kashmirit, shkroi në rrjetet sociale: “Çfarë ndodhi me armëpushimin? Shpërthime të fuqishme dëgjohen në gjithë Srinagarin!!!”
Tensionet mes Indisë dhe Pakistanit janë historikisht të larta, veçanërisht për çështjen e Kashmirit, i cili ka qenë shkak për tre luftëra mes dy vendeve që nga ndarja e tyre në vitin 1947.
