Pas sulmit në kanalin kryesor të Iber-Lepencit në Varage të Zubin Potokut, Serbia përmes strukturave të saj propaganduese, tentoi ta fajësoi policinë e Kosovës.
Në mediet serbe, atë të KURIR, e afërt më presidentin serb, Aleksandar Vuçiq lëshuan propagandë kinse Agjencia Inteligjence serbe, BIA, ka siguruar emra të zyrtarëve policorë të Kosovës, që sipas tyre kanë kryer sulmin ne kanalin Ibër-Lepenc.
Por, në faqen e BIA-s, nuk figuron asnjë komunikatë rreth kësaj çështje.
Tëvë1 mëson ekskluzivisht përmes burimeve se e gjithë kjo ndodhi nga disa individë të tjerë në pjesën veriore të Kosovës, të shtyrë nga Millan Radoiçiq, i dyshuari kryesor për sulmin terrorist në Banjskë të Zveçanit më 24 – shtator.
Zëvendësdrejtori i Policisë së Kosovës për rajonin e veriut, Veton Elshani i quan këto dezinformata të fabrikuara nga Serbia.
Siç bëri të ditur ai, këto veprime janë duke u hetuar.
“Nuk është ndonjë befasi për neve që shohim raporte të tilla, ose emra të policëve në tabloide të ndryshme, se qe gati tre vite që jam në këtë vend unë kam mësuar shumë për dezinformata dhe informata të rrejshme. Kështu që nuk është befasi për neve. Policët që përmenden aty janë të gjithë polic, janë në vazhdimësi duke kryer detyrën e tyre në veri të vendit”, tha Elshani
Ai thotë se të gjithë policët që janë përmendur në lajmet e shpërndara në disa medie serbe në Beograd dhe në veri, janë zyrtar policorë që sot vazhdojnë të bëjnë punë profesionale në katër komunat veriore.
“Ne i marrim si informacione por nuk na brengosin, ne jemi duke e kryer punën tonë në veri të vendit, nuk ka asnjë informatë e rreme apo dezinformatë që neve na pengon në kryerjen e punëve tona”, tha ai.
E njohësi i sigurisë, Arben Dashevci konsideron se Kosova ende po vazhdon të përballet me luftë hibride nga Serbia.
“Me qëllim të manipulimit të opinionit publik të Republikës së Kosovës. Me jemi në pikun e luftës hibride me Serbinë, andaj qytetarët e Republikës së Kosovës janë mësuar tashmë me këtë luftë hibride, ekzistojnë fakte të patjetërsueshme se çfarë lufte të egër, speciale dhe hibride e bënë Serbia kundrejt Republikës së Kosovës. Kështu që këto dezinformata nuk kalojnë” , u shpreh Dashevci.
Në paraburgim lidhur me sulmin në kanalin kryesor, Ibër Lepenc, janë dy të dyshuar, vëllezërit Dragisha dhe Jovan Viqentijeviq të cilët dyshohet se me datë 29.11.2024 vendosën eksplovizin në Iber Lepenc duke dëmtuar kështu infrastrukturën kritike të vendit.
