Një person është lënduar rëndë pasi i njëjti dyshohet se është sulmuar fizikisht me thikë nga tre persona të panjohur të dielën në rrugën “Gjon Sereqi” në Ferizaj.
Zëdhënësi i Policisë për rajonin e Ferizajit, Kanun Veseli për Tëvë1 ka njoftuar se lidhur me këtë rast është arrestuar një 16 vjeçar, shtetas i Shqipërisë, me vendbanim të përkohshëm në Kosovë.
Veseli ka thënë se gjatë kontrollit trupor ndaj të dyshuarit është gjetur dhe sekuestruar një thikë që dyshohet të jetë përdorur në kryerjen e veprës penale.
Ndërkaq, me vendim të prokurorit të rastit, i njëjti është ndaluar për 24 orë, në pritje të procedurave të mëtejshme hetimore.
“Më 27.04.2025, rreth orës 15:10, në rrugën “Gjon Sereqi” në Ferizaj, ka ndodhur një rast i lëndimit të rëndë trupor. Viktima, F.V. (M/K), 16 vjeç, pas një mosmarrëveshjeje, është sulmuar fizikisht me një mjet të mprehtë (thikë), dyshohet nga tre persona, duke pësuar lëndime të rënda trupore. Pas trajtimit fillestar në emergjencën e Ferizajt, viktima është dërguar për trajtim të mëtejshëm në Qendrën Klinike Universitare të Kosovës (QKUK) në Prishtinë. Lidhur me rastin është njoftuar prokurori i shtetit. Sektori i hetimeve të stacionit policor në Ferizaj, pas një pune intensive hetimore në terren, ka arritur të identifikojë një person të dyshuar dhe ka ndërmarrë veprimet e nevojshme të kërkimit. Më 28.04.2025, rreth orës 12:30, në rrugën “At Nikë Prela” në Ferizaj, policia ka arrestuar të dyshuarin M.D.,16 vejç shtetas i Republikës së Shqipërisë, me vendbanim të përkohshëm në Kosovė, Ferizaj. Gjatë kontrollit trupor ndaj të dyshuarit, është gjetur dhe sekuestruar një thikë që dyshohet të jetë përdorur në kryerjen e veprës penale. Me vendim të prokurorit të rastit, i dyshuari është ndaluar për 24 orë, në pritje të procedurave të mëtejshme hetimore. Zyra për Informim e Drejtorisë Rajonale të Policisë do t’ju mbajë të informuar për çdo zhvillim tjetër lidhur me këtë rast”, ka thënë Veseli./teve1.info/
Tre persona therin më thikë një tjetër në Ferizaj, viktima lëndohet rëndë
