Tomorr Avdia nga A2CNN, thotë se moskonstituimi i Kuvendit për gjashtë herë radhazi tregon mos interes të partive politike.
Avdia thotë se partitë nuk janë të interesuara as për zgjedhje, pasi që sipas tij nuk janë ulur të bisedojnë për negociata.
“I gjithë spektri politik, nuk është i interesuar për zgjidhje, sepse nuk janë ulur për të bërë negociatat për t’i arritur qëllimet. Qëllimi kryesor është formimi i institucioneve. Derisa nuk flet Kurti, nuk ka negociat të qëndrueshme – flasin anësorit, skema e dytë”, tha ai në emisionin “Këndi i Debatit” në Tëvë1.
Ndërkohë, ai thotë se kryeministri në detyrë, Albin Kurti së bashku me partinë e tij janë duke sfilitur opozitën.
“Kurti nuk flet, sepse ai dhe partia e tij janë të gatshëm në këto rrethana që po tentojnë ta lodhin opozitën, kjo është lojë e të ‘fortit’, ta lodhin opozitën, ta sfilitin pastaj ta vënë para dy fakteve. Fakti i parë është ose të shkohet në zgjedhje të parakohshme, e dyta në qoftë se shkohet në zgjedhje pastaj rezultatet unë i shoh atë se çfarë ia kanë ofruar qytetarëve përgjatë këtyre dy javëve një sfidë”, deklaroi ai.
Sot, ka dështuar për të gjashtën herë konstituimi i Kuvendit të Kosovës. Për të katërtën herë kandidatja e Vetëvendosjes për kryeparlamentare, Albulena Haxhiu, nuk ka arritur që të sigurojë më shumë se 57 vota.
