Të premten ka dështuar përsëri seanca e konstituimit të Kuvendit të Kosovës, ngase e propozuara e partisë së VV-së për kryetare të Kuvendit, Albulena Haxhiu nuk mori votat e mjaftueshme.
E për këtë, Nuredin Ibishi, anëtari i LDK-së ka deklaruar se arsyeja që Haxhiu nuk po arrin të bëhet kryetare e Kuvendit është që nuk i ka votat e duhura.
Sipas tij, ky dështim i seancës është një ngërç politik, ku siç tha ai zgjidhja më e mirë është që të caktohet data e zgjedhjeve të ardhshme.
“Kur nuk ka një qëndrim të përbashkët shtet-formues mes fokusit politik-shqiptar atëherë s’kam çka mendoi që më mirë është në zgjedhje të reja. Nuk është çështja tashmë e Albulenës një kandidateje që po insiston tashmë Vetëvendosja, por është e asaj që kjo nuk po ka votat e duhura. Çdo here ajo parti që e ka shumicën është fajtor, ose duhet të gjen shtet-dalje duke bërë koalicion me një parti të madhe politike këtë rast PDK ose LDK. Këtë mënyrë është një ngërç politik dhe zgjidhja më e mirë është që në takimin e radhës të jetë një marrëveshje politike të tejkalohet kjo, të konstituohet Kuvendi dhe të caktohet data e zgjedhjeve të ardhshme”, ka deklaruar ai në emisionin “Ditari” në tëvë1.
Madje, Ibishi thotë se presidentja e vendit, duhet të ndërhyjë, t’i thërret partitë politike për një marrëveshje mes partive politike.
“Presidentja duhet të ndërhyjë, t’i thërret partitë politike për një marrëveshje dhe kjo të shkohet në zgjedhjet e reja. Në zgjedhjet e jashtëzakonshme unë mendoj që do të jetë një diferencë ndoshta edhe pak më e balancuar, nëse nuk ka një harmonizim, përafrim qëndrimeve mes partisë fituese apo koalicionit fitues dhe partisë tjetër të madhe shqiptare atëherë është vështirë të shkohet më tej, prapë kemi me ardhur në një situatë të tillë”, ka shtuar ai ndër të tjera./teve1.info/
