Në këto momente as Kurti e as Vuçiq nuk e kanë mendjen në dialog.
I pari ende nuk ka arritur t’i krijoj institucionet e reja si fitues i zgjedhjeve, ndërsa i dyti po përballet me protesta masive në Serbi.
Por, pavarësisht këtyre rrethanave të enjten në Prishtinë erdhi pa paralajmërim ndërmjetësi i Bashkimit Evropian për dialogun Kosovë – Serbi, Peter Sorensen.
Ai në ora 11:00 u prit në takim nga kryenegociatori i Kosovës për dialog, Besnik Bislimi.
Pas përfundimit të takimit që zgjati rreth një orë e gjysmë diplomati danez nuk tha ndonjë gjë konkrete për vizitën e tij në Kosovë.
“Jam ne Prishtinë me stafin në kuadër të angazhimeve si emisar i dialogut, bashkë me stafin tim. Pas Prishtinës do të shkojë në Beograd. Është një vizitë normale, jam i lumtur që jam këtu. Do të vazhdoj në Beograd dhe pastaj në Bruksel. Jemi duke punuar, kaq”, tha Sorensen, pas takimit me Bislimin.
Ndërkaq në njoftimin e qeverisë thuhet se me ndërmjetësin Sorensen u diskutua për zbatimin e marrëveshjeve të arritura në kuadër të dialogut.
“Biseduan rreth zbatimit të marrëveshjeve të ndryshme të nivelit teknik, e më tej u theksua edhe rëndësia e fillimit të diskutimeve të zbatimit të marrëveshjes së Brukselit dhe Aneksit Implementues të Ohrit në kuadër të procesit të dialogut”, thuhet në komunikatën e qeverisë.
Emisari Sorensen gjatë ditës u prit në takim edhe nga komandanti i KFOR-it, gjeneralmajor Enrico Barduani ku mes tjerash diskutuan për çështjet e sigurisë në rajon.
Komandanti i KFOR-it nënvizoi përpjekjet e KFOR-it për të siguruar një mjedis të sigurt dhe të sigurt për të gjithë njerëzit që jetojnë në Kosovë dhe në mbështetje të dialogut të lehtësuar nga BE-ja.
Pas Prishtinës, Sorensen do të udhëtojë për në Beograd e më pas do kthehet në Bruksel.
