Pas tri tentimeve, deputetët e Kuvendit të Kosovës e kanë votuar raportin e Komisionit të përkohshëm për verifikimin e mandateve dhe kuorumit.
Raporti i Komisionit të verifikimit të mandateve dhe kuorumit është miratuar me 119 vota pro.
Paraprakisht, me 120 vota pro u votua për përpilimin e raportit të ri për verifikimin e mandateve nga Komisioni i njëjtë.
Anëtarët e Komisionit kishin kohë 30 minuta që të përpilojnë raportin e ri të Komisionit për verifikimin e mandateve dhe të kuorumit.
“Konstatojmë se 120 deputetë të gjithë janë për Komisionin e njëjtë, lus anëtarët e Komisionit për 30 minuta të mblidhen dhe të përpilojnë raportin e ri të Komisionit për verifikimin e mandateve dhe të kuorumit”, tha kryesuesi i Kuvendit, Avni Dehari.
Ky dakordim i deputetëve u arrit sot, pas mbledhjes që krerët e partive politike zhvilluan me kryesuesin e Kuvendit, Avni Dehari para fillimit të vazhdimit të seancës konstituive.
Ndryshe, deputetët nuk kanë arritur ta kalojnë këtë pikë të parë të rendit të ditës që nga 15 prilli kur nisi seanca konstituive e Kuvendit të Kosovës.
Miratimi i këtij raporti i hap rrugë konstituimit të Kuvendit të ri të Kosovës.
Ndërkaq, pas konstituimit të Kuvendit do të hapet rruga për formimin e Qeverisë së re të Kosovës.
Mblidhet komisioni për të hartuar raportin e ri për verifikimin e mandateve
