Në njoftimin e SBASHK-ut, bëhet e ditur se në protestën e thirrur më 20 maj nga BSPK-ja, e bazuar në zërin e anëtarësisë do të marrin pjesë në mënyrë masive edhe të punësuarit në sektorin e arsimit.
Në një përgjigje për teve1.info, kryesuesi i Kolegjiumit për Arsim (AKK), dhe njëkohësisht drejtor në Drejtorinë Komunale për Arsim në Fushë Kosovë (DKA), Samir Shahini, ka deklaruar se nuk do ta përkrahin këtë grevë, sepse sipas tij ky është një ndryshim i lajmëruar me vonesë.
Teksa ka shtuar se si DKA, kërkojnë nga SBASHK-u dhe Qeveria sqarime lidhur me këtë ndryshim.
“Qëndrimi ynë është që ne nuk jemi lajmëruar me kohë, dhe nuk e përkrahim këtë ndryshim të lajmëruar me vonesë. Kemi qenë në rregull me protestën e lajmëruar për nesër, por jo me grevë të lajmëruar me vonesë. Kërkojmë nga SBASHK-u dhe Qeveria të dalin me sqarime për këtë ndryshim”, tha Shahini.
Kurse sa i përket ndikimit të grevës te nxënësit, ai theksoi se kjo grevë e dëmton rëndë procesin mësimor duke pasur parasysh që është përfundimi i vitit shkollor.
“Në përgjithësi greva e dëmton procesin mësimor, sidomos në fund të vitit shkollor kur kemi edhe përmbylljen e vlerësimeve për nxënës, testin e arritshmërisë dhe maturës”, shtoi ai./teve1.info./
