Krasniqi ka thënë se rritja e energjisë për familjet kosovare ka qenë një zgjidhje e paramenduar dhe e projektuar nga qeveria Kurti 2 përmes ZRRE-së.
“Duke shfrytëzuar rrethanat e asaj kohe, rritja e energjisë për familjet kosovare ka qenë një zgjidhje e paramenduar dhe e projektuar nga qeveria Kurti 2, e cila përmes ZRRE-së ka bërë një gjë të tillë në muajin shkurt ku mori vendimin e pakuptimtë për rritjen e tarifave. Një institucion që duhej të ishte i pavarur si ZRRE-ja ishte vënë në zbatim ekskluziv të projeksioneve të pushtetit dhe këtë e kishte bërë me një injorim të plotë për interesin qytetar dhe me një ftohtësi të plotë për detyrën që ata e kishin”, tha ai, raporton Teve1.
Po ashtu, Krasniqi shprehet i lumtur për vendimin e Apelit, teksa falënderon qytetarët që kanë mbështetur kauzën e tyre.
“Sot jam i lumtur që ky vendim i padrejtë tashmë është konfirmuar edhe nga gjykata e apelit se ka qenë vendim i kundërligjshëm. Falë punës dhe angazhimit të këtij ekipi, tashmë saga për tarifat e reja ka përfunduar dhe ky vendim i padrejtë ndaj qytetarëve ka marrë fund. Na vjen mirë që kemi arritur të lehtësojmë barrën financiare për 450 mijë familje kosovare që ishin dëmtuar nga rritja e tarifave të energjisë. Dua të shpreh falënderim për secilin qytetar që i ka besuar kauzës tonë dhe që ka mbështetur angazhimin tonë opozitar për të ndaluar këtë haraç të padrejtë të pushtetit mbi ta. Tash e tutje qytetarët do të paguajnë faturat me tarifat e vjetra, ashtu siç ka qenë para se qeveria e ZRRE të impononte tarifat e shtrenjta”, tha kreu i PDK-së, Memli Krasniqi. /teve1.info/
