Analisti, Xhavit Drenori ka vlerësuar se partitë opozitare kanë taktizuar me mosbotimin e raportit për mandatin e deputetëve në seancën konstituive.
Ai ka thënë se po të votohej ky raport, do të vazhdohej me fazën tjetër, zgjedhjen e kryetarit të Kuvendit që sipas tij për këtë votat i ka pas LVV.
“Taktizim doli që bëri opozita, respektivisht PDK, LDK, AAK, që nuk e votuan, sepse po të votohej atëherë automatikisht do të hynim në një fazë tjetër dhe faza tjetër do të ishte që nëse i ka pas numrat, që unë besoj se do të kalonte në fazën e dytë e cila do të ishte zgjedhja e kryetarit dhe nënkryetarëve të Kuvendit”, ka thënë Drenori në emisionin “InfoNata”.
Ai ka thënë se opozita po dëshiron ta “kap vet ligjin në dorë”.
“Unë nuk e kuptoj pse me bë këtë , në një farë mënyre e kanë kap vet ligjin në dorë. Sikur të kishin lejuar të ecët përpara, menjëherë pas mbledhjes të shkon në Kushtetuese dhe nëse ishte konstatuar se ka pas shkelje të ligjit, e kishin nxjerrë shumë më keq Kurtin dhe Vetëvendosjen”, ka thënë ai.
