Autoritetet indiane kanë vendosur trupa për të goditur protestat vdekjeprurëse në shtetin lindor të Bengalit Perëndimor mbi një projekt-ligj të diskutueshëm të miratuar së fundmi që kritikët thonë se do të zbehte të drejtat e muslimanëve për të menaxhuar dhurimet fetare (vakëf) me vlerë më shumë se 14 miliardë dollarë.
Sipas gazetës The Times of India, protestat mbi amendamentin federal të Vakëf-it në distriktin Murshidabad me shumicë myslimane të Bengalit Perëndimor u përshkallëzuan të premten dhe të shtunën, duke rezultuar në tre vdekje dhe arrestimin e më shumë se 150 personave.
E përditshmja tha të dielën se Gjykata e Lartë e Kalkutës kishte urdhëruar vendosjen “e menjëhershme” të Forcave Paraushtarake të Sigurisë Kufitare (BSF) në zonë. Karni Singh, inspektor i përgjithshëm i divizionit të kufirit të Bengalit Jugor të BSF, tha se forcat u dërguan për të “ndihmuar” policinë lokale, jo për “veprim të pavarur”.
Projektligji , i cili amendoi një ligj të 1995 mbi qeverisjen e vakëfit ose pronave myslimane të dhuruara për qëllime fetare ose bamirësie, u miratua në fillim të këtij muaji, raporton Al Jazeera.
Vakëfi i referohet pronës personale – të luajtshme ose të paluajtshme – që dhurohet përgjithmonë nga muslimanët për qëllime fetare ose bamirëse.
Megjithatë, përfshirja e jomuslimanëve në menaxhimin e pronave të vakëfit ka shkaktuar shqetësim tek muslimanët, të cilët thonë se qeveria federale e udhëhequr nga Partia Hindu nacionaliste Bharatiya Janata (BJP) po i diskriminon ata, pasi grupet e tjera fetare lejohen ende të menaxhojnë institucionet e bazuara në besim.
BJP e kryeministrit, Narendra Modi pretendon se ndryshimet synojnë të sjellin transparencë dhe të luftojnë korrupsionin dhe keqmenaxhimin në qeverisjen e vakëfeve.
Por, muslimanët kanë frikë se ndryshimet në ligjin e vitit 1995 mund t’i lënë pronat e vakëfeve, duke përfshirë xhamitë historike, dyqanet, faltoret, varrezat dhe mijëra hektarë tokë, të cenueshme ndaj konfiskimit, mosmarrëveshjes dhe rrënimit.
Opozita thotë se është një sulm ndaj pakicës myslimane të Indisë, e cila përbën rreth 15 për qind të 1.4 miliardë banorëve të Indisë, të garantuar në kushtetutën laike të Indisë.
Udhëheqësi i Partisë së Kongresit të opozitës, Rahul Gandhi, ka thënë se projektligji “u drejtohet myslimanëve sot, por vendos një precedent për të synuar komunitetet e tjera në të ardhmen”.
Nën udhëheqjen e Modit si kryeministër, i cili ka ndërmarrë një sërë vendimesh kundër komunitetit fetar mysliman, India ka parë polarizimin më të madh fetar në Indi në dekada.
