Analisti politik, Xhevdet Pozhari ka kritikuar mosreagimin e Prokurorisë Speciale të Kosovës, lidhur me arrestimin e katër serbëve në Gjakovë të kamuflluar si “pelegrinë” ku dy nga ta ishin pjesëtarë të ushtrisë dhe policisë serbe.
Ai në një reagim në Facebook ku ka lavdëruar punën e Policisë së Kosovës ka thënë se për vepra të tilla që cenojnë rendin kushtetues duhet të merret Prokuroria Speciale.
“Pra, pavarësisht se djem e vajza pjesëtarë të Policisë së Kosovës në Gjakovë po bëjnë gjithçka, edhe përtej mundësive të tyre për të ofruar siguri për qytetarët dhe vendin e tyre, ende nuk kemi asnjë reagim publik nga ata që e kanë për detyrë – Prokuroria. Veprat penale kundër rendit kushtetues janë jashtë kompetencave të prokurorive themelore. Respektivisht, për veprat që cenojnë rëndë sigurinë, siç është spiunazhi, duhet të merret Prokuroria Speciale. Por, nga Blerim Isufaj ende nuk kemi asnjë reagim! Ishalla nuk e ka ndërmend me vepru si në rastin e Radoiçiqit kur e kishte dhënë pëlqimin për heqjen e urdhërarrestit ndaj tij”, ka shkruar Pozhari.
Të shtunën janë arrestuar 4 serbë të cilët ishin paraqitur si pelegrinë, ndërsa edhe në Prizren janë ndaluar 12 persona të strehuar në një objekt fetar. Në mesin e këtyre dy grupeve kishte pjesëtarë të ushtrisë dhe policisë serbe.
