Ka afër 80 vite që merren me përpunimin e drurit.
Por, fabrika e cila gjendet në Parkun e Bizneseve në Drenas, tash dy vite, dyert, shkallët e tavolinat i eksporton edhe në Shtetet e Bashkuara të Amerikës.
E ky biznes, si dhe shumë të tjerë që eksportojnë nga Kosova në ShBA, tani do të paguajnë edhe një taksë prej 10%.
Kësisoj, Kreshnik Shehu pronari i kësaj fabrike ende nuk di se si do të ndikojë kjo taksë te shitjet që do ketë në Amerikë, ani pse planifikimet i kishte që këtë vit të eksportojë më shumë.
“Faktikisht ne nuk jemi eksportues të kamotshëm por këto dy vitet e fundit kemi filluar eksportin në Amerikë, vitin e kaluar një sasi të vogël kurse këtë vit planifikimi është që të kemi eksport shumë më të madh. Kurse tashmë me marrjen e lajmit që është vendosur taksa reciproke prej 10% tash nuk e dimë se si do të veprojmë, çka do të jetë reagimi i blerësve tonë atje në Amerikë”, tha Shehu.
Madje sipas tij çmimet e produkteve të cilat i shesin do të shtrenjtohen.
“Tash jemi të befasuar, nuk e dimë sigurt se çka do të ndodhë pas vurjes së taksës 10% sepse për klientët është rritur për 10%, pasi nëse një produkt është blerë 1000 mijë euro atëherë edhe 100 euro ka kosto shtesë për klientin blerësin”, tregoi pronari i fabrikës.
Në bazë të të dhënave zyrtare të Doganës së Kosovës, vlera e eksporteve të Kosovës në SHBA në vitin 2022 ka qenë 131.1 milionë euro, në vitin 2023 ajo ka qenë 103.9 milionë euro, ndërsa në vitin 2024, vlera e eksporteve të kompanive kosovare në këtë shtet ka pësuar një rënie të theksuar, duke arritur vetëm në 39.1 milionë euro.
Produktet kryesore që eksportohen në ShBA përfshijnë ushqime, lëngje, tekstil, dyshekë, si dhe prodhime nga druri dhe plastika.
Presidenti Amerikan, Donald Trump të mërkurën vendosi që mallrat e importuara nga Kosova, Shqipëria dhe Mali i Zi do t’i nënshtrohen një tarife prej 10 për qind, ndërsa për Serbinë kjo tarifë do të jetë 37 për qind, për Bosnjë dhe Hercegovinën do të jetë 35 për qind, kurse për Maqedoninë e Veriut 33 për qind.
