Atëherë kur të gjithë prisnin firmën mbi kontratë, zyrtarizimin e marrëveshjes Paratici-Milan, në mënyrë të papritur palët i kanë dhënë fund negociatave duke bërë që pista kryesore për postin e Drejtorit Sportiv të bie përfundimisht. Mbetet ende e paqartë se çfarë i dërgoi palët në një përfundim të tillë, por e vetmja e gjë e sigurt për momentin është fakti që “djalli” është vënë sërish në kërkim të një drejtori të ri.
Në këto kushte janë rikthyer edhe një herë në tavolinën e stafit drejtues emra që qarkullonin fuqishëm përpara se Paratici të takohej me Furlanin. Igli Tare, Tony D’Amico dhe Giovanni Manna janë tre emrat ku stafi kuqezi është përqendruar.
Përpara se Paratici dhe Furlani të uleshin në tavolinë për të diskutuar detajet e marrëveshjes, emri më i lakuar ishte Igli Tare, me ish Drejtorin e Lazios që ishte favorit pasi e njeh shumë mirë ambientin në Serie A. Në atë kohë, mediat shkruanin me bindje se Tare ishte i përzgjedhuri nga Zlatan Ibrahimovic, me ish futbollistin kuqezi që konsiderohet si një njeri i Ibrës. Në këto kushte, emri i Tares rikthehet edhe një herë fuqishëm në garë për t’u ulur në stolin e “djallit”, pavarësisht se fjalën e fundit e ka sërish Furlani.
