Nexhat Vllasaliu po e mohon kategorikisht përfshirjen e tij, në një prej vrasjeve më misterioze në Kosovë në vitet e fundit.
Vlasaliu, akuzohet se bashkë me vëllanë e tij, Jetonin, e vranë biznesmenin Bedri Rexhepi, trupi i të cilit nuk u gjet për disa muaj.
Sipas Prokurorisë, Rexhepi u vra për shkak se vëllezërit Vllasaliu donin të përfitonin nga ai 30 mijë euro, dhe ekzekutimi u bë me një plan të hartuar mirë.
Në seancën e sotme, siç ka bërë edhe në të kaluarat, i akuzuari u deklarua se ai nuk ka të bëjë asgjë me këtë rast.
Ky deklarim i Vllasaliut nuk u prit mirë nga familja e të ndjerit.
Ndryshe nga Nexhati, vëllau i tij Jetoni e ka pranuar se e ka varrosur trupin e Bedri Rexhepit në pyll, mirëpo ka thënë se disa persona të maskuar e kanë kryer vrasjen.
Për disa deklarata të vëllaut të tij të cilat e përfshijnë në rast edhe Nexhatin, ai kërkoi një përballje.
Vllasaliu ka folur edhe për disa biseda me ndërmjetësuesit e familjes së tij dhe familjes Rexhepi.
Nexhat Vllasaliu refuzoi që t’i përgjigjet pyetjeve të avokatit të familjes Rexhepi, Besnik Berisha.
Gjykimi në këtë rast është drejt fundit. Para shpalljes së aktgjykimit, palët do t’i thonë fjalët e tyre përfundimtare në muajin maj.
