Profesori universitar, Nexhmedin Spahiu ka vlerësuar se Nisma Socialdemokrate do të bëhet pjesë e koalicionit qeverisë me Lëvizjen Vetëvendosje.
Spahiu ka vlerësuar se nëse Nisma nuk bëhet pjesë e qeverisë, vendi do të shkojë në zgjedhje dhe se kjo më së paku i konvenon Nismës dhe Aleancës.
Ai në emisionin “InfoNata” në Tëvë1 ka thënë se e sheh të pamundur një qeveri të udhëhequr nga PDK-ja.
“Nëse Nisma nuk futet në koalicion me Vetëvendosjen atëherë do të kemi zgjedhje të reja, Unë e shoh të pamundur një qeveri të udhëhequr nga PDK-ja për shkak të qëndrimit të LDK-së. Në këtë rast më të rrezikuara nga rezultatet paraprake i shoh Nismën dhe Aleancën për Ardhmërinë e Kosovës”, ka thënë Spahiu.
Sipas tij, Nisma me tre deputetë e ka mundësinë të bëhet pjesë e qeverisë dhe në këtë mënyrë të rritet partia dhe sipas tij, këtë mundësi nuk do ta lëshojë Fatmir Limaj.
“Me tre deputetë Nismës i ka ardhur rasti me hy në qeveri dhe një politikan siç është Fatmir Limaj nuk besoj që e lëshon këtë rast, sepse është mundësi me rrit partinë e vet, sidomos në një qeverisje të Kurtit ku shumica e ministrave janë kanë pa rezultate, Fatmir Limaj do të shkëlqente”, ka thënë Spahiu.
Nga ana tjerr zyrtarë të Nismës kanë thënë se preferojnë një qeveri me opozitën por nuk e kanë përjashtuar mundësinë që të diskutojnë edhe me Lëvizjen Vetëvendosje nëse marrin ftesë.
