Aktakuza e ngritur ndaj Milan Radoiçiqit dhe 44 anëtarë të grupit të tij për sulmin terrorist në Banjskë të Zveçanit, është përmendur në raportin e Departamentit Amerikan të Shtetit.
Raporti i vitit 2025, thekson se Prokurorisë Speciale të Kosovës në ngritjen e aktakuzës i asistuan edhe institucionet e sigurisë të SHBA-së.
“Në Kosovë, duke përdorur aftësitë dhe mentorimin e mësuar nga Zyra e Zhvillimit, Asistencës dhe Trajnimit të Prokurorisë jashtë shtetit një prokuror ngriti një aktakuzë kundër 45 të pandehurve, përfshirë Milanin Radoiçiq, nënkryetar i partisë kryesore të serbëve të Kosovës, i sanksionuar nga Zyra e Kontrollit të Pasurive të Huaja”
Ky raport i DASH-it po vlerësohet se afirmoi punën e Prokurorisë Speciale.
“Afirmon tutje punën e Prokurorisë Speciale dhe njëhkosisht një bashkëpunim i tillë, e forcon tutje në arenën ndërkombëtare aktakuzën e ngritur nga ana e Prokurorisë Speciale të Kosovës” , vlerëson Drizan Shala, ekspertë i sigurisë.
Në këtë raport përmendet edhe gjuha e urrejtjes ndaj Shqiptarëve nga zëvendëskryeministri i Serbisë, Aleksandër Vulin.
“Aspekti i dytë është gjuha e përdorur nga Aleksandër Vulin ndaj komunitetit shqiptar, në Luginën e Preshevës ku dihet që ka një represion shtetërorë nga ana e Beogradit zyrtar ndaj komunitetit shqiptar”, thotë Shala.
Për këtë çështje, në raport theksohet se Vulin në vazhdimësi ka përdorur publikisht terma poshtërues për shqiptarët.
