Mëngjesi i së shtunës i gjeti para selisë së EULEX-it.
E pritjes për të takuar vëllaun e tyre, i erdhi fundi.
Tre vëllezërit e ish-presidentit Hashim Thaçi qëndruan rreth një orë me këtë të fundit.
Pas tyre, për të takuar Thaçin, erdhi edhe bashkëshortja e tij, Lumnija.
Edhe ajo e kishte të paraparë qëndrimin për vetëm një orë.
Gjersa vizitat zhvilloheshin, para zyreve të EULEX-it, po zhvillohej një protestë paqësore.
Aty, disa të rinj me pankarta në duar, po kërkonin drejtësi për ish-presidentin.
Pas një kohe, erdhën edhe forcat policore të Kosovës.
Gjatë rrugës qarkullonin vetura me flamuj të UÇK-së e me thirrje për Thaçin.
Krejt në fund pas 4 orësh pritje, ish-presidenti Thaçi nuk doli nga kishte hyrë brenda selisë së EULEX-it.
Momentet e fundit u kuptua se ai do të largohej nga dalja tjetër.
E qytetarët tentuan të bllokonin edhe rrugën kryesore, por numri i njësiteve policore u shtua.
Nën përcjellje, Thaçi mbaroi vizitat e u nis për në Hagë.
Krejt këtë moment e përjetoi me emocione të forta një bashkëvendas i tij.
“Unë kam qenë në luftë, jam invalid i luftës, kem të vrarë në luftë e sot me i marrë krerët u UÇK-së me i sjell kur donë ata vet, e me i sjell pas varrimit të babës, më mirë le të na marrin neve qe unë vullnetarisht i dal i shkoj, unë vij, mo se ai është njeri i madh, ai prej 91-ës është mundu për këtë popull edhe zemrën e ka bre të mirë”, ka deklaruar qytetari, Gazmend Manxholli.
Ish-presidenti Thaçi erdhi të premten në Kosovë te varri i babait të tij, pasi Gjykata Speciale nuk e liroi atë për të marrë pjesë në ceremoninë e mbajtur të martën.
Ndaj Thaçit, Specialja ka ngritur dy aktakuza, për krime lufte dhe për ndikim te dëshmitarët.
