Ministri i Bujqësisë, Pylltarisë dhe Zhillimit Rural, Faton Peci, ka folur për bastisjen e djeshme në Ministrinë që ai drejton.
Ai tha se në media nuk është raportuar e vërteta dhe ka qenë shpifje, derisa shtoi se atë mund të thonë vetëm institucionet e drejtësisë.
“Ju e keni shpjegimin e Ministrisë dhe akterëve se si kanë shkuar procedurat, mua më kanë njoftuar pas raportimit medial se krejt çka është raportuar në media ka qenë e pavërtetë, shpifje dhe me tendencë. E vërteta është ajo që atë le ta thonë institucionet e drejtësisë dhe akterët që janë intervistuar”, ka thënë ai.
“Mua më kanë thënë që nuk ekziston pozicion ku thuhet se është bartje e mobilieve, aq më tepër që në këtë raportim medial, ekziston një video që është bërë te kati i objektit të Ministrisë së Bujqësisë, që nuk ka qenë pjesë e kontratës për të bërë renovim”, ka thënë Peci, shkruan RTK.
Ndryshe, dje, Prokuroria Speciale e Kosovës kishte njoftuar se me qëllim të verifikimit të pretendimeve apo dyshimeve për veprimet e disa zyrtarëve publikë të Ministrisë së Bujqësisë, Pylltarisë dhe Zhvillimit Rural, lidhur me renovimin e objektit që e shfrytëzonte AAK-ja, ka autorizuar Policinë e Kosovës, që të kryejë veprime hetimore në mbledhjen dhe sigurimin e provave për sqarimin e rrethanave të çështjes.
