Presidenti i Federatës Shqiptare të Futbollit (FSHF), Armand Duka, ka folur edhe njëherë për Evropianin U21 të vitit 2027, që Shqipëria e organizon bashkë me Serbinë.
Në intervistën e gjatë për sajtin zyrtar të UEFA-s, ka folur për përfitimet që do t’i ketë Shqipëria me organizimin e Evropianit.
Intervista e Dukës për UEFA-n është publikuar të enjten në faqen zyrtare të FSHF-së.
“Fillimi i aplikimit ka qenë individual, por me një lloj pragmatizmi rrugës vendosëm të bashkonim kandidaturat me Federatën e Serbisë për të pasur më shumë shanse që ta fitonim organizimin e këtij turneu. Shqipëria nuk ka organizuar kurrë më parë një turne sporti të një niveli kaq të lartë. Ne do të presim finalet e Kampionatit Evropian U17 në maj këtë vit, që gjithashtu është një kompeticion i rëndësishëm, por pritja e finaleve të Kampionatit Evropian U21 është një nivel shumë më i lartë. Benefitet e Shqipërisë janë të shumta, që nga pjesëmarrja e Kombëtares tonë U-21 për herë të parë në finalet e një Evropiani e për të vijuar me përmirësimet në infrastrukturë që do të sjellë ky turne. Do të ketë përfitime ekonomike veçanërisht në drejtim të turizmit”, ka thënë Duka.
Ai tutje ka theksuar se me Evropiani i përbashkët me Serbinë do të jetë më shumë sesa turne futbolli.
“Në fund, por jo për nga rëndësia, mendoj se mesazhet që ne i japim botës me këtë organizim janë shumë të mëdha. Kampionati Evropian U-21 2027 do të jetë më shumë sesa një turne futbolli. Do të shërbejë si nxitje për të thyer barriera, për të forcuar mirëkuptimin e ndërsjellë dhe për të krijuar një të ardhme më pozitive për popujt e Ballkanit dhe do të tregojë se çfarë mund të arrihet kur njerëzit bashkohen rreth një objektivi të përbashkët, të frymëzuar nga fuqia e futbollit”, ka theksuar Duka.
Duka mban pozitë të rëndësishme në Konfederatën Evropiane të Futbollit. Është njëri prej nënpresidentëve të UEFA-s. Po ashtu Duka prej dy vitesh drejton edhe Komitetin e Medias në UEFA.
“Është privilegj për mua të jap kontributin tim në Komitetin Ekzekutiv të UEFA-s dhe më pas si kryetar i komitetit të medias të UEFA-s”, ka thënë Duka.
Komiteti Ekzekutiv i UEFA-s në shkurt bëri zyrtar vendimin që Kampionati Evropian i vitit 2027 për futbollistët deri në 21 vjet të mbahet në Shqipëri dhe Serbi.
Reagimet për organizimin e përbashkët të Shqipërisë e Serbisë ishin të shumta. Kanë reaguar njohës të futbollit, grupe tifozësh e tifozë të ndryshëm. Por nuk ka pasur e as që pritet të ketë ndonjë reagim nga Federata e Futbollit e Kosovës.
