Klubi i futbollit të femrave Mitrovica, ka hedhur akuza të rënda te klubi rival KFF Dukagjini, për lidhje me Federatën e Futbollit të Kosovës dhe ndikim në vendimin e ndeshjes Ulpiana – Dukagjini.
Ndeshja e javës së 13-të e Superligës së femrave, ndërmjet Ulpianës e Dukagjinit e luajtur më 17 mars, kishte përfunduar me rezultat 1:1. Por klubi nga Klina ishte ankuar në Komisionin e Garave në FFK, për pozitën e fizioterapeutit të klubit.
“Në lidhje me paraqitjen e parregullt në protokolin e ndeshjes të Avdyl Ramadanit në cilësinë e fizioterapeutit, i njëjti është paraqitur si fizioterapeut, ndërsa kualifikimi i tij është teknik i fizioterapisë me profil arsimor të shkollës së mesme”, shkruan në vendimin e Komisionit të Garave.
Për këtë arsye ndeshja Ulpiana – Dukagjini është regjistruar me rezultat zyrtar 0:3, në favor të Dukagjinit.
Klubi kampion nga Mitrovica ngre dyshimet se kjo është bërë pa asnjë bazë në rregullore dhe akuzon klubin nga Klina për lidhje të mira të zyrtarëve të Dukagjinit me Federatën.
KFF Mitrovica është lidere e Superligës së femrave me 32 pikë, pas 12 ndeshjeve, por tani me vetëm një pikë më shumë se Dukagjini, që pas fitores në tavolinë, regjistron 31 pikë.
“Komisioni Garave pa kurrfarë baze juridike regjistron ndeshjen me rezultat zyrtar 0:3 për Dukagjinin duke iu referuar nenit 6 paragrafit 2 pika g), nen i cili nuk e detajon pasojën e shkeljes së këtij paragrafi. Pra, askund në aktet normative nuk thuhet së ndeshja humbet nëse mungon mjeku, sikurse ka vepruar Komisioni Garave për këtë rang përkatës në rastin e apostrofuar”, shkruan në reagimin e klubit Mitrovica.
“Ky rregull është hequr që para disa vitesh për shkak të dallavereve që klubet bënin në të kaluarën për të kurdisur një ndeshje. FFK ka vendosur se ndeshja nuk mund të fillojë pa mjek dhe në këtë rast ekipi që nuk e posedon mjekun e humb ndeshjen me rezultat zyrtar 3:0. Përndryshe, nëse ndeshja ka filluar dhe përfunduar pa mjek nga njëra ekip, atëherë ndeshja do të regjistrohet me rezultatin e arritur në fushë”, thuhet tutje në reagimin e klubit derisa zyrtarët e saj do të marrin masa të tjera nëse vazhdohet në këtë mënyrë, gara.
“Nëse organet përgjegjëse pranë FFK-së nuk e ndalojnë këtë dukuri, klubi ynë do të shqyrtojë mundësinë e mos vazhdimit të kampionatit sepse në këtë mënyrë nuk ia vlen të investohet, sigurisht që ka edhe klube të tjera që janë kundër këtyre dukurive negative në futbollin e femrave.”
