Një tjetër futbollist nga Kosova iu bashkua të hënën, Kombëtares shqiptare,në përgatitjet për kualifikimet e Botërorit 2026.
Altin Bytyqi, aktualisht futbollist i Partizanit në kampionatin shqiptar është ftuar nga Sylvinho në grumbullim dhe në stërvitje me kombëtaren.
Trajneri i futbollit dhe analisti i emisionit “VAR” në Tëvë 1, Robert Gjeraj, e dha lajmin ekskluziv të dielën mbrëma, ndërsa të hënën erdhi konfirmimi zyrtar.
24-vjeçari i cili ka qenë pjesë e Kosovës te grupmosha U19, nuk është ftuar më nga Kosova dhe bëhet futbollisti i dytë që i bashkohet Shqipërisë nga Kosova, pas Etnik Brrutit, ditë më parë.
Bytyqi luan si qendërmbrojtës dhe në këtë edicion ka zhvilluar 17 ndeshje me Partizanin.
Ai ka luajtur më parë te Besa e Pejës, Laçi e Kukësi në Shqipëri dhe te Medjimurje në Kroaci.
