Bashkimi Evropian po mban të hënën një konferencë donatorësh për Sirinë, për të mbledhur mbështetje për të siguruar një tranzicion paqësor pas rrëzimit të presidentit, Bashar Assad dhjetorin e kaluar.
Ministrat dhe përfaqësuesit e partnerëve perëndimorë, si dhe fqinjëve rajonalë të Sirisë, vendeve të tjera arabe dhe agjencive të OKB-së do të marrin pjesë në takimin njëditor në Bruksel, i cili do të kryesohet nga shefja e politikës së jashtme të BE-së, Kaja Kallas.
Siria do të marrë pjesë në konferencë – edicioni i nëntë i këtij lloji – për herë të parë dhe do të përfaqësohet nga Ministri i Jashtëm Asaad Hassan al-Shibani. Veprimtaria u organizua me nxitim nga BE në përpjekje për të përfituar nga ndryshimi që ka përfshirë vendin, raporton AP.
Kombet e Bashkuara në vitin 2017 vlerësuan se do të kushtonte të paktën 250 miliardë dollarë për të rindërtuar Sirinë, ndërsa ekspertët thonë se ky numër mund të arrijë të paktën 400 miliardë dollarë.
Siria është gjithashtu në axhendën e një takimi të ministrave të jashtëm të BE-së që Kallas po kryeson veçmas të hënën. Blloku 27-vendesh ka filluar të lehtësojë sanksionet e sektorit financiar, të energjisë dhe transportit për të inkurajuar autoritetet e reja.
Ndërsa qëllimi i konferencës së të hënës është të gjenerojë premtime ndihme, ajo është gjithashtu e fokusuar në plotësimin e nevojave ekonomike të Sirisë dhe kjo kërkon qetësi. Infrastruktura, shëndetësia dhe arsimi duhet të rriten. Nevojiten vende pune dhe para për programet e punës, në mënyrë që sirianët të fillojnë të sigurojnë jetesën.
