Dy ndeshjet e së shtunës në Superligën e futbollit, patën fund dramatik duke u penguar fituesi vetëm në kohën shtesë.
Në duelin Dukagjini – Drita, gjilanasit që po prijnë në tabelë shënuan të parët që në pjesën e parë përmes ukrainasit Kostyshyn në minutën e 39-të.
Ismet Munishi trajner i vendësve u përjashtua nga loja për shkak të protestave por skuadra e tij e gjeti golin e barazimit në frymën e fundit, me Hekuran Berishën që shënoj në kohën shtesë për rezultatin final 1:1.
Drita lidere tani ka 54 pikë, derisa Dukagjini i shtati me 32 sosh.
Edhe dueli tjetër i ditës ndërmjet Gjilanit e Prishtinës u mbyll 1:1.
Mysafirët shënuan në minutën e 22-të përmes autogolit të Jaroviqit.
Golin e një pike me vlerë të madhe Gjilani e gjeti në minutën e dytë të shtesës, nga Roganoviq.
Gjilani ruan vendin e katërt me 35 pikë, tri më shumë se Prishtina në pozitën e pestë.
