Në Beograd është ndaluar Ivan Vukoviq, nënkryetar i Partisë Demokratike të Socialistëve (DPS) dhe deputet i kësaj partie në Kuvendin e Malit të Zi.
Atë e ka ndaluar Agjencia e Sigurisë dhe Informacionit (BIA) e Serbisë.
Këtë informacion e ka konfirmuar për “Vijesti” Partia Demokratike e Socialistëve e ish-presidentit malazez, Milo Gjukanoviqit.
Në DPS thanë se një person i afërt me Vukoviqin, i cili ishte me të privatisht në Beograd, tregoi se anëtarët e BIA-s e arrestuan atë teksa po dilte nga hoteli “Hilton”.
Sipas një burimi të “Vijesti” që ishte i pranishëm gjatë ndalimit, disa persona me uniformë dhe dy me rroba civile, të cilët u prezantuan si pjesëtarë të BIA-s, e pritën përpara ashensorit dhe e ndaluan.
Vukoviq u shpjegoi atyre se ndodhej në Beograd si shoqërues i një anëtari të familjes për arsye shëndetësore. Ai tha se po përgatiteshin të ktheheshin në Mal të Zi, por pavarësisht kësaj, u ndalua.
Nga DPS thanë për “Vijesti” se nuk kanë informacione për vendndodhjen e tij aktuale dhe po përpiqen të angazhojnë një avokat.
Ndryshe, Vukoviq mbrëmë publikoi një video nga protestat në Beograd në llogarinë personale në Facebook.
