Prokuroria e Prishtinës ka autorizuar Policinë që të ndërmarr veprime hetimore lidhur me deklaratën e anëtarit të LVV-së në KQZ, Sami Kurteshi drejtuar gazetarëve.
Kështu kanë bërë të ditur për teve1.info nga Prokuroria Themelore në Prishtinë.
“Lidhur me pyetjen tuaj e konfirmoj se Prokuroria Themelore në Prishtinë ka autorizuar Policinë e Kosovës me ndërmarrjen e veprimeve hetimore ndaj Sami Kurteshit ”, thuhet në përgjigjen e Prokurorisë.
Lidhur me deklarimet e Kurteshit, ka reaguar edhe Asociacioni i Gazetarëve të Kosovës (AGK).
Në reagimin e AGK-së, thuhet se gjatë një pyetje drejtuar atij nga gazetarja e Nacionales, Besarta Hoti, Kurteshi është përgjigjur me fjalët: “Ju jeni media kriminale, të vrasësve me pagesë”.
Andaj, AGK-ja e konsideron këtë deklaratë si të papranueshme dhe të rrezikshme.
“AGK-ja e konsideron këtë deklaratë si të papërgjegjshme, të papranueshme dhe të rrezikshme. Akuza e tillë, e paprecedent ndaj një medie, nga një zyrtar i lartë i partisë në pushtet, jo vetëm që cenon lirinë e shtypit, por rrezikon edhe sigurinë e gazetarëve” – thuhet në reagimin e AGK-së.
