Sekretari i Përgjithshëm i NATO-s, Mark Rutte së bashku me një delegacion të lartë të martën dhe të mërkurën do të qëndrojë për vizitë në Kosovë.
Policia e Kosovës ka njoftuar qytetarët se për të mundësuar qarkullim të lirë të eskortës sipas itinerarit të lëvizjes, në disa rrugë të Prishtinës do të bëjë ndërprerje të përkohshme të qarkullimit të trafikut.
Sipas Policisë ndërprerja do të bëhet në intervale të shkurtra kohore të disa segmenteve rrugore në të cilat pritet të kalojë eskorta, si dhe në afërsi të objekteve shtetërore, ndërsa qytetarët do duhet të përdorin rrugë alternative.
“Me datën 10 dhe 11 mars 2025, në Republikën e Kosovës, do të qëndrojë për vizitë një delegacion i lartë i NATO-s i kryesuar nga sekretari Gjeneral i saj, Mark RUTTE. Policia e Kosovës, gjatë kësaj vizite, do të kujdeset për ruajtjen e rendit dhe qetësisë publike gjatë kohës së lëvizjes së eskortës dhe kohës së qëndrimit të delegacionit në Republikën e Kosovës. Për të mundësuar qarkullim të lirë të eskortës sipas itinerarit të lëvizjes si dhe zhvillimin e aktiviteteve sipas agjendës së vizitës, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore (ku pritet të kalojë eskorta) dhe në afërsi të objekteve shtetërore, ku do të ketë riorientim të trafikut në rrugë alternative, andaj Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik”, thuhet në komunikatë./teve1.info/
