Gjithë vëmendja e botës ishte kah Shtëpia e Bardhë të martën.
Kjo meqë, Donlad Trump për herë të parë doli para Kongresit Amerikan si president rreth 50 ditë pasi mori detyrën.
Trump një pjesë të fjalimit të tij, foli për luftën në Ukrainë, ku tha se tashmë ka marrë zotim nga presidenti ukrainas, Volodymyr Zelensky për nënshkrim të marrëveshjes për paqe.
Ai përmendi disa politika për Amerikën. Por në asnjë moment nuk foli për Ballkanin Perëndimor.
Ambasadori i karrierës, Albert Prenkaj vlerëson se përmes kësaj, nënkuptohet që Trump nuk e ka prioritet politikën e jashtme në gadishullin ballkanik.
“Pra edhe kësaj here as ky president pra nuk e paraqet si prioritet i politikës së jashtme të Shteteve të Bashkuara të Amerikës, por që nuk do të thotë se në një të ardhme Ballkani dhe Kosova nuk do të jenë pjesë e agjendës së politikës së jashtme të Administratës së re Trump”, thotë Albert Prenkaj – ambasador karriere.
Mendim të njëjtë ka edhe ish-diplomati kosovar në Gjermani, Blerim Canaj.
“Negative për shkak se nuk merret me ne, pozitive për shkak se siç duket edhe ne ende nuk jemi të gatshëm dhe nuk e kemi të qartë formën se si do të komunikojmë me Donald Trump. Kjo edhe duke pasur parasysh edhe fundin e zgjedhjeve tek ne, duke pasur parasysh personelin apo akterët në kabinetin e Donald Trump por edhe akterë tek ne”, shprehet ai.
Madje sipas tij, Trump do të ketë një qasje më agresive ndaj Kosovës, për dallim nga paraardhësit e tij.
“Këtu është dallimi në mes të kabinetit të Biden apo demokratëve dhe republikanëve posaçërisht me dikënd si Trump. Ata kanë shkuar në atë ‘tërhiqe e mos e këputë’, ndërsa me Donald Trumpt sikurse e kemi vërejtur në qoftë se nuk kemi një përgatitje diplomatike dhe në qoftë se nuk dijmë si të qasemi, prehen shumë shpejt çështjet”, thotë Canaj.
Trump mbajti fjalimin një ditë pasi njoftoi se ka pezulluar gjithë mbështetjen ushtarake të SHBA-së për Ukrainën, e cila, tash e tre vjet, lufton kundër forcave pushtuese ruse.
