Të prangosur, njëri pas tjetrit hynë në gjykatore.
Për dy të akuzuarit për spiunazh, Bedri Shabani e Muharrem Qerimi, filloi seanca fillestare.
Derisa familjarët e ndiqnin mes lotëve, të akuzuarit dukeshin në humor të mirë.
Prokuroria Speciale po i ngarkon Shabanin e Qerimin me akuza mjaft të rënda.
Të dy, sipas aktakuzës së Prokurorisë, kanë mbledhur dhe dërguar informacione e dokumente tek BIA serbe lidhur me UÇK-në, eprorët dhe pjesëtarët e saj, si dhe për institucione të ndjeshme të sigurisë, si për Policinë, Agjencinë e Kosovës për Inteligjencë e Inspektoriatin Policor të Kosovës.
Me këto veprime, prokurori i Prokurorisë Speciale, Bekim Kodraliu, tha se Shabani e Qerimi i bën dëm Republikës së Kosovës.
“Përmes komunikimeve telefonike, postës elektronike dhe takimeve fizike të zhvilluara në territorin e Serbisë, me këto veprime i pandehuri ka rrezikuar dhe dëmtuar rëndë rendin juridik kushtetues dhe sigurinë e Republikës së Kosovës, duke e ndihmuar po ashtu BIA-n, në krijimin e një narrative të pavërtetë me qëllim që të ndërlidh Spitalin Ushtarak të UÇK-së të Mollopovcit të Shtimes, me të ashtuquajturën “Shtëpia e Verdhë” në Burrel të Shqipërisë, kinse janë bërë trafikim organesh. Si dhe të vë në dyshim masakrën e Reçakut, duke kërkuar nga zyrtari i BIA-s dhe B.J që të ndërmarrin veprime operacionale të cilat do të shkaktonin një konflikt të gjerë ndëretnik në territorin e Republikës së Kosovës”, tha Prokurori Bekim Kodraliu
Muharrem Qerimi, sipas aktakuzës, veprimtarinë në shërbim të BIA-s serbe e nisi në vitin 2012.
“E ka ndihmuar agjencinë e inteligjencës serbe që njihet si BIA, në formën e mbledhjes dhe dërgimit të informacioneve, dokumenteve dhe materialeve të ndryshme që kanë të bëjnë me luftën, pjesëtarët e UÇK-së, emrat e eprorëve të Policisë së Kosovës, të AKI-së, IPK-së, pastaj emrat e dëshmitarëve tashmë të njohur të Dhomave të Specializuara të Kosovës në Hagë. Pastaj në lidhje me veprat penale të krimit të organizuar, korrupsionin”, u shpreh prokurori.
Shabani dhe Qerimi nuk u deklaruan të mërkurën nëse e ndjejnë veten fajtor.
“Plotësisht e kam kuptuar aktakuzën”, tha Qerimi.
“Nuk kam pasë mundësi me lexu mirë aktakuzën. Nuk do të deklarohem në këtë seancë, por në një moment tjetër”, tha Shabani.
“Deklarimi i klientit tim tash për tash, është i pamundur, për shkak se siç e konstatoi Gjykata, pak minuta para se ju të hyni në sallë, atij i është dorëzuar një kopje e aktakuzës, e cila përveçse është voluminoze, kërkon analizë dhe sqarime dhe nga mbrojtja”, tha Besnik Berisha, avokat i Bedri Shabanit.
Seanca e sotme është ndërprerë dhe u vendos që të caktohet për një datë tjetër, kur të akuzuarit të jenë të gatshëm të deklarohen rreth fajësisë.
Bedri Shabani dhe Muharrem Qerimi u arrestuan në qershor të vitit të kaluar, pas hetimeve disa mujore të Prokurorisë Speciale.
Ky është një prej rasteve më të rëndësishme të spiunazhit, për të cilin ka ngritur aktakuzë Prokuroria Speciale.
