Të mërkurën mbrëma ka përfunduar faza e play-offit të Ligës së Kampionëve dhe tashmë është kompletuar 1/8 e finales të kësaj gare, në të cilën do të paraqiten 16 skuadra.
Shorti për 1/8 e finales në Champions do të tërhiqet të premten nga ora 12:00, për të vazhduar pastaj me shortin e Ligës së Evropës dhe Ligës së Konferencës.
Megjithatë, skuadrat që kanë avancuar në 1/8 e finales të Championsit nëpërmjet play-offit veçse i kanë parasysh kundërshtarët e mundshëm.
Real Madridi në 1/8 e finales do të përballet me Atletico Madridin apo Bayer Leverkusenin, skuadra që u kualifikuan direkt në këtë fazë.
E njëra prej këtyre dy skuadrave do të jetë kundërshtare e Bayern Munchenit që po ashtu luajti në fazën e play-offit.
Paris Saint-Germaini do të luaj me Liverpoolin apo Barcelonën, ndërsa Benfica është kundërshtarja tjetër e mundshme e këtyre dy skuadrave.
Borussia Dortmundi e Club Brugge do të përballen me Lillen apo Aston Villan ndërkohë Feyenoordi dhe PSV Eindhoveni do të kenë punë me Arsenalin ose Interin.
