Edi Martini ka firmosur me KF Trepça. Klubi i Ligës së Parë në Kosovë dhe trajneri i njohur kanë gjetur gjuhën e përbashkët, teksa lajmi është bërë publik në rrjetet sociale.
“Zyrtare Edi Martini, trajneri i ri i KF Trepça KF Trepça ka kënaqësinë të njoftojë arritjen e marrëveshjes me trajnerin Edi Martini, i cili do të marrë drejtimin e skuadrës sonë Me një karrierë të pasur dhe një filozofi të lojës, Martini sjell përvojë, disiplinë dhe ambicie për një ekip të fortë dhe konkurrues. I urojmë mirëseardhje dhe suksese në këtë rrugëtim të ri”- shkruan klubi.
Edi Martini ka firmosur me KF Trepça. Klubi i Ligës së Parë në Kosovë dhe trajneri i njohur kanë gjetur gjuhën e përbashkët, teksa lajmi është bërë publik në rrjetet sociale.
Edi Martini vjen pas një eksperience në krye të pankinës së Teutës.
Por tifo-grupi mitrovicas, Torcida, ka lënë të kuptohet se nuk pajtohet me emërimin e Martinit në postin e trajnerit. Ky grup tifozësh, që përkrah klubet me emrin Trepça, ka publikuar postimin e bërë nga Martini më 4 shkurt dhe ka shkruar “@KF Trepça ??”.
Më 4 shkurt, pasi UEFA e zyrtarizoi Evropianin Shqipëri – Serbi, Martini në Facebook shkroi: “Erdhi dita që të organizojmë një Kampionat Evropian të 21-vjeçarëve në Shqipëri. Një superarritje, jo vetëm në aspektin sportiv që jemi kualifikuar si vend organizator, por edhe në aspektin ekonomik ku Shqipëria do të jetë kryefjala e të gjithë Evropës për një muaj me radhë. Asnjërit nga ne nuk na ndryshon mendimin për ta, por të organizosh një finale të Kampionatit Evropian është një ëndërr që e shikon shumë rrallë. Bravo dhe sukses ekipit tonë kombëtar U21, suksese Alban Bushi”, shkroi Martini në rrjetet sociale.
Ai la të kuptohet se organizimi i përbashkët i Evropianit nuk ia ndryshon mendimin për Serbinë. Por deklarata e tij megjithatë po sjell ndërlikime.
