Shkruan: Albina Koca
Profesori amerikan, Alon Ben Meir tha se kryeministri, Albin Kurti duhet të fokusohet në përmirësimin e marrëdhënieve me ShBA-në dhe BE-në si dhe të punojë ngushtë për të zbutur çështjet konfliktuale mes tyre.
Ai për teve1.info tha se Kurti duhet ta kujtojë se ai ka nevojë për ShBA-në dhe BE-në më shumë sesa ata kanë nevojë për të.
“Së pari, ai duhet të synojë përmirësimin e marrëdhënieve mes dy vendeve duke pranuar dallimet që i ndajnë ato dhe së dyti, në vend që të debatojë se kush ka të drejtë dhe kush e ka gabim, Kurti duhet të fokusohet në përmirësimin e marrëdhënieve si me ShBA-në ashtu edhe me BE-në dhe të punojë ngushtë për të zbutur çështjet konfliktuale mes tyre. Kurt duhet të kujtojë gjithashtu se ai ka nevojë për SHBA-në dhe BE-në më shumë sesa ata kanë nevojë për të. Varësia financiare dhe e sigurisë e Kosovës duhet të shqyrtohet me kujdes pa rrezikuar domosdoshmërisht interesin kombëtar dhe pavarësinë e Kosovës”, ka deklaruar profesori amerikan”, ka deklaruar ai.
Ben Meir ka thënë se deklaratat e emisarit special të ShBA-së për misione të veçanta, Richard Grenell në lidhje me kryeministrin, Albin Kurti pasqyrojnë në masë të madhe qëndrimin e administratës Trump.
Profesori amerikan tha se deklaratat e Grenellit i atribuohen kryesisht mosmarrëveshjes mes Kurtit dhe administratës Trump e Biden në lidhje me Asociacionin e komunave me shumicë serbe.
“Grenell kishte të drejtë duke deklaruar se ‘marrëdhëniet nuk kanë qenë kurrë më të ulëta. Albin Kurti është dënuar nga administrata e parë e Trump, administrata e Bidenit, NATO, BE dhe ambasada e SHBA, Anthony Blinken’. Deklarata e tij është në përputhje me qëndrimet e tij të mëparshme në lidhje me kryeministrin Kurti dhe pasqyron në masë të madhe qëndrimin e administratës Trump. Në një intervistë për mediat kosovare, Kurti ka hedhur poshtë komentet e Grenellit, duke thënë se marrëdhënia e Kosovës me SHBA-në aktualisht është në nivelin më të mirë që nga fillimi i saj. Deklarata e Grenellit i atribuohet kryesisht mosmarrëveshjes mes Kurtit dhe administratës Trump dhe Biden në lidhje me Asociacionin e Komunave Serbe. Kosova fillimisht u pajtua për zbatimin e Asociacionit më shumë se një dekadë më parë dhe u përfshi në propozimin francezo-gjerman, të cilin Kurti gjithashtu e pranoi verbalisht, por refuzoi ta zbatojë”, ka deklaruar ai në një intervistë për teve1.info.
Më tej ai ka vlerësuar se ‘shkëmbimet e ashpra” në mes të Kurtit dhe Grenellit nuk janë të dobishme në kërë fazë të hershme të administratës së re Trump.
“Shkëmbimet e ashpra midis Kurtit dhe Grenellit sigurisht që nuk ishin të dobishme, veçanërisht në këtë fazë të hershme të administratës së re Trump. Nëse Kurti do të formojë qeverinë e re të koalicionit, ai do të jetë i mençur të moderojë pikëpamjet e tij në lidhje me asociacionin, të ketë një bisedë të sinqertë me Grenellin dhe të fillojë një dialog të ri mes ShBA-së dhe Kosovës”./teve1.info
